Eling- eling mangka eling
Rumingkang di bumi alam
Darma wawayangan bae
Raga taya pangawasa
Nyucruk galur ti Karuhun
Nutur lacak para Wali
Nu nyambuang ka balarea
Titinggal ti Nini Aki
Ngawaris kabudayaan
Seni Sunda sawer asih
Seni Sunda pikeun suluk
Gambaran siloka diri
Hirup ulah rek ka jongjonan
Mawa diri sing taliti
Satincak make pikiran
Pikiran ieu pepeling
Pepeling Jalan Pituduh
Nuduh keun diri cing lirih
Hahalang lugay disingray
Mun hayang salamet diri
Di dunya ukur ngumbara
Peupeujeuh cing repeh rapih
Repeh rapih nu salembur
Kacai jadi saleuwi
Kadarat jadi salogak
Pageuh pakuat pakait
Ulah ingkah balilahan
Ancrubna ngajadi hiji
Ngahiji ngajadi dulur
Sadaya mahlukna Gusti
Hubungan sabilulungan
Keudalkeun katineung ati
Ka Ibu sareng ka Rama
Neneda ka Maha Suci
Neda agung cukup lumur
Neda jembar pangaksami
Bilih aya kalepatan
Seueur pisan ka kirangan
Amin ya robbal alamin
Muga Gusti nangtayungan